Azərbaycan ötən il ixrac etdiyi neftin həcmini açıqlayıb

Ötən il Azərbaycan Dövlət Neft Şirkətinin (SOCAR) neft ixracı 2,8 milyon ton təşkil edib.

“Report” xəbər verir ki, bu barədə Energetika Nazirliyinin 2024-cü il üzrə açıqladığı operativ məlumatlarında deyilir.

Bu, 2023-cü ilin göstəricisi ilə müqayisədə 0,3 milyon və ya 9,7 % azdır.

Ümumilikdə, 2024-cü ildə Azərbaycandan xarici ölkələrə 24,4 milyon ton neft (kondensatla birlikdə) ixrac olunub. Bu, 2023-cü illə müqayisədə 0,8 milyon ton və ya 3,2 % azdır.

Ötən il konsorsium 21 milyon ton neft ixrac edib. Bu, 2023-cü illə müqayisədə 1,1 milyon ton və ya 5 % azdır.

Azərbaycandan ixrac olunan neftin 0,6 milyon tonu “Abşeron” yatağından hasil olunan "qara qızıl"ın payına düşüb.

Qeyd edək ki, Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub.

Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.