Azərbaycan metanol ixracını 34%-dək azaldıb

Bu ilin sentyabr ayında Azərbaycan 5,3 milyon ABŞ dolları dəyərində metanol ixrac edib.

“Report”un məlumatına görə, bu barədə İqtisadi İslahatların Təhlili və Kommunikasiya Mərkəzinin “İxrac İcmalı”nın 2020-ci ilin oktyabr sayında bildirilir.

Məlumata görə, bu, ötən ilin eyni ayı ilə müqayisədə 0,1 milyon ABŞ dolları və yaxud 1,8% azdır.

2020-ci ilin yanvar-sentyabr aylarında isə Azərbaycandan xarici ölkələrə 35,4 milyon ABŞ dolları dəyərində metanol ixrac olunub. Bu isə ötən ilin eyni dövrü ilə müqayisədə 18,1 milyon ABŞ dollar və yaxud 33,8% azdır.

Qeyd edək ki, metanol istehsalı Qaradağ rayonunda yerləşən Azərbaycan Dövlət Neft Şirkətinin (SOCAR) Metanol Zavodunda həyata keçirilir.

Metanol Zavodu 2013-cü ildə istismara verilib. Zavod 2016-cı ildən SOCAR-ın törəmə müəssisəsi olan “SOCAR Methanol” MMC-nin idarəçiliyi altında fəaliyyət göstərir, 2017-ci ilin avqust ayından isə şirkətin mülkiyyətinə keçib. Müəssisə illik 650-700 min ton metanol istehsal etmək gücünə malikdir. İstehsalatda xammal olaraq təbii qaz və duzlaşdırılmış su istifadə olunur.