ARDNŞ bu il 107,5 min metr qazma işi görüb

Bakı. 6 noyabr. REPORT.AZ/ Bu ilin yanvar-oktyabr aylarında Azərbaycan Dövlət Neft Şirkəti üzrə (müştərək müəssisələr və əməliyyat şirkətləri istisna olmaqla) 107 451 metr qazma işi görülüb ki, bunun da 105 624 metri istismara, 1 827 metri isə kəşfiyyata aid olub.

"Report" Dövlət Neft Şirkətinə istinad edərək xəbər verir ki, ötən ilin eyni dövrü ilə müqayisədə qazma işlərinin həcmi 14,7% azalıb.

Cari ilin oktyabr ayı ərzində isə ARDNŞ (MM və ƏŞ istisna olmaqla) 8 714 metr qazma işi həyata keçirib. Bu sahədə görülmüş işlərin 8 515 metri istismara, 199 metri isə kəşfiyyata aid olub.

Qeyd edək ki, 2013-cü il ərzində ARDNŞ üzrə 142 656 metr qazma işi görülüb ki, bunun da 135 665 metri istismara, 6 991 metri isə kəşfiyyata aid olub.