Naxçıvan məktəblərində “Son zəng” çalınıb, Emin Əmrullayev iştirak edib - YENİLƏNİB-2

İyunun 14-də elm və təhsil naziri Emin Əmrullayev Naxçıvan şəhəri Heydər Əliyev adına tam orta məktəbdə keçirilən “Son zəng” tədbirində iştirak edib.

Bu barədə "Report"un yerli bürosu xəbər verir.

Qeyd edilib ki, 2022-2023-cü tədris ilində ölkə üzrə 98 649 nəfər XI sinfi bitirir.

Onlardan 3 166 nəfəri Naxçıvan Muxtar Respublikasının ümumtəhsil məktəblərindən məzun olur.

Elm və təhsil naziri Emin Əmrullayevin rəhbərlik etdiyi nümayəndə heyəti Naxçıvan Muxtar Respublikasına səfərə gedib.

"Report"un yerli bürosu xəbər verir ki, səfər çərçivəsində qonaqlar əvvəlcə Ümummilli Lider Heydər Əliyevin Naxçıvan şəhərinin baş meydanındakı abidəsi önünə gül dəstəsi qoyub, Ulu Öndərin xatirəsini dərin ehtiramla yad ediblər.

Sonra qonaqlar muzeyin eksponantları ilə tanış olublar.

Səfər çərçivəsində qonaqlar Naxçıvan şəhərindəki Heydər Əliyev adına tam orta məktəbdə keçirilən məzun günündə iştirak edəcək, Naxçıvanda Azərbaycan Prezidentinin səlahiyyətli nümayəndəsi Fuad Nəcəfli ilə görüşəcəklər. Həmçinin, "STEAM Təlim-Tədris Mərkəzi"nin açılışında iştirak edəcəklər.

Günün ikinci yarısında Təbii Ehtiyatlar İnstitutu, Bioresurslar İnstitutu, "Xan Sarayı" Dövlət Tarix-Memarlıq, Möminə Xatun və Açıq Səma Altındakı Muzey Kompleksi ilə tanışlıq olacaq.

Elm və təhsil naziri Emin Əmrullayev Naxçıvana səfər çərçivəsində Heydər Əliyev adına tam orta məktəbdə keçiriləcək məzun günündə iştirak edəcək.

"Report"un yerli bürosu xəbər verir ki, 2022-2023-cü tədris ilində Naxçıvan Muxtar Respublikasının ümumtəhsil məktəblərini ümumi orta təhsil bazasından 4 677, tam orta təhsil bazasından isə 3 166 şagird bitirir.

Qeyd edək ki, bu gün muxtar respublikanın 212 ümumtəhsil məktəbində son zəng çalınacaq.