Yaponiya Silahlı Qüvvələri “Osprey” konvertoplanının istifadəsini dayandırıb

Yaponiya Özünümüdafiə Qüvvələri çərşənbə günü konvertoplanın qəzaya uğramasının tam şəraiti aydınlaşana qədər öz sərəncamında olan “Osprey”lərin istifadəsini dayandırıb.

“Report” TASS-a istinadən xəbər verir ki, bu barədə Yaponiya Nazirlər Kabinetinin baş katibi Hirokazu Matsuno növbəti mətbuat konfransında bildirib.

“Özünümüdafiə Qüvvələrinin “Osprey”inə gəlincə, onların istifadəsi hadisənin səbəbləri aydınlaşana qədər dayandırılıb”, - o qeyd edib.

Matsuno vurğulayıb ki, ABŞ “Osprey” hava gəmisinin qəzaya uğraması yerli sakinlər arasında həddindən artıq narahatlığa səbəb olub.

Yaponiya Özünümüdafiə Qüvvələri hazırda xidmətdə olan 14 “Osprey”ə malikdir. Saqa prefekturasında baza yaratmaqla onların sayını 17-yə çatdırmaq planlaşdırılır.