Bakı. 1 iyun. REPORT.AZ/ Venesuela prezidenti Nikolas Maduro ilə 4 müxalifət qubernatoru arasında keçən görüşdə siyasi məhbusların 1 gün ərzində azad edilməsi barədə razılaşma əldə olunub.
"Report" RİA "Novosti"yə istinadən xəbər verir ki, bu barədə görüş iştirakçılarından biri – Taçira ştatının qubernatoru Leydi Qomes məlumat yayıb.
O, bildirib ki, görüş Karakasdakı "Miraflores" prezident sarayında keçirilib.
"Prezidentin cavabı belə oldu – yaxın 24 saat ərzində məhbusların azad edilməsinə başlanılacaq. Biz isə bütün siyasi məhbusların azadlığa buraxılması prosesində iştiraka hazır olmalıyıq", - deyə Qomes dövlət televiziyasının efirində bildirib.
Mayın 20-də keçirilən prezident seçkilərində yenidən qalib gələn Maduro bildirib ki, siyasi zorakılığa görə saxlanılan və həbs edilən müxalifətçilərin azad edilməsinə nail olacaq. Artıq Suliya ştatında 20 nəfər azadlığa buraxılıb.