Vaşinqton İranda parlament seçkilərinin azad və ədalətli keçəcəyini gözləmir

ABŞ administrasiyası İranda martın 1-də keçiriləcək parlament seçkilərinin azad və ədalətli keçəcəyini gözləmir.

“Report” xəbər verir ki, bu barədə Dövlət Departamentinin mətbuat xidmətinin rəhbəri Metyu Miller brifinqdə deyib.

“Mən İranda seçkilərin azad və ədalətli olacağını gözləmirəm. Güman edirəm ki, çoxlu sayda iranlı bu seçkinin azad və ədalətli keçəcəyini gözləmir. Yəqin ki, artıq bildiyiniz kimi, minlərlə namizəd qeyri-şəffaf proses vasitəsilə seçkidən kənarlaşdırılıb.

Dünya çoxdan bilir ki, İranın siyasi sistemi qeyri-demokratik və qeyri-şəffaf inzibati, məhkəmə və seçki sistemləri ilə səciyyələnir”, - diplomat vurğulayıb.

Qeyd edək ki, İranda martın 1-də birpalatalı parlamentə - Məclisə (yaxud İslam Şurası Məclisinə) növbəti seçkilər keçiriləcək. Məclisin deputatları ümumi seçkilər zamanı birbaşa gizli səsvermə yolu ilə seçilirlər.

Seçkilərdə iştirak etmək üçün rekord sayda - 49 min nəfər müraciət edib, onlardan 15 mindən çoxu namizəd kimi təsdiqlənib (1713 nəfər qadındır, 2020-ci ildəkindən iki dəfə çox).