Somalidə partlayış olub, ölənlər var

Somalinin paytaxtı Moqadişo şəhərində Avropa çempionatının İspaniya və İngiltərə komandaları arasında keçirilən final matçının nümayiş olunduğu kafenin yaxınlığında avtomobil partlayıb.

“Report” xəbər verir ki, bu barədə Somalinin “Shabelle Media Network” televiziya və radio şirkəti məlumat yayıb.

Qeyd olunub ki, hadisə nəticəsində bir neçə nəfər həlak olub, yaxınlıqdakı evlərin pəncərələri sınıb.

“SONNA” agentliyi polisə istinadən məlumat yayıb ki, kafenin yaxınlığında baş verən partlayış nəticəsində azı 5 nəfər ölüb, 20 sakin yaralanıb.

Hadisəyə görə məsuliyyəti hələlik heç bir qruplaşma üzərinə götürməyib.