Sloveniyanın Baş naziri miqrantların leqallaşdırılmasının lehinə çıxıb

Sloveniyanın Baş naziri Robert Qolob miqrasiyanı tənzimləmənin yeganə yolunun onu leqallaşdırmaq olduğunu hesab edir.

“Report” TASS-a istinadən xəbər verir ki, Avropa İttifaqının İspanyanın Qranada şəhərində keçirilən qeyri-rəsmi sammitində iştirak edən siyasətçinin bu barədə sözləri ölkə hökumətinin “X” sosial şəbəkəsindəki səhifəsində yayılıb.

“Əminəm ki, miqrasiyanın tənzimlənməsinin və effektiv idarə olunmasının yeganə yolu onu leqallaşdırmadır. Mümkün qədər çox miqrant, o cümlədən əvvəlcədən hazırlanmış təlim mərkəzlərinin köməyi ilə leqallaşdırılmalıdır. Söhbət təkcə dili öyrənməkdən (qəbul edən ölkənin) yox, həm də qalacağın ölkədə əlavə bacarıqlar əldə etməkdən gedir. Avropanın əmək qüvvəsinə, eləcə də bu insanların Aİ-də tamamilə qanuni şəkildə iş və ev əldə etməsinə kömək etmək yollarını ərsəyə gətirəcək həll yollarına ehtiyacı var”, - Qolob deyib.

Qeyd edək ki, Macarıstan və Polşa Avropa İttifaqı liderlərinin təklif etdiyi, qaçqın və miqrantların müəyyən edilmiş kvotalar əsasında Avropa ölkələrinə yerləşdirilməsini, imtina edildiyi təqdirdə isə onların saxlanması üçün vəsaitin ümumi fonda ödənilməsini nəzərdə tutan yeni miqrasiya paktına qarşıdır.