Si Cinpin: Çin öz suverenliyini və maraqlarını qətiyyətlə müdafiə etməkdə davam edəcək

Pekin Vaşinqtonla əməkdaşlıq çərçivəsində öz suverenliyini və inkişaf maraqlarını daim müdafiə edəcək.

“Report” TASS-a istinadən xəbər verir ki, bunu Çin Xalq Respublikasının sədri Si Cinpin ABŞ Prezidentinin milli təhlükəsizlik üzrə köməkçisi Ceyk Sallivanla görüşdə deyib.

"Suverenliyimizi, təhlükəsizliyimizi və inkişaf maraqlarımızı qətiyyətlə qorumağa xidmət edən mövqeyimiz dəyişməz olaraq qalır", – o bildirib.

Sədr qeyd edib ki, ABŞ və Çində vəziyyət dəyişsə də, Pekinin iki ölkə arasında münasibətlərin sabit, sağlam və davamlı inkişafını təmin etmək məqsədi dəyişməyib.

Si Cinpin əlavə edib ki, Çin iki ölkə xalqları arasında ənənəvi dostluğu bundan sonra da qoruyub saxlamağa çalışacaq.