Rusiyada qatarların toqquşması nəticəsində 31 nəfər xəsarət alıb

Rusiyanın Murmansk vilayətində sərnişin və yük qatarlarının toqquşması nəticəsində xəsarət alanların sayı 31 nəfərə çatıb.

“Report” TASS-a istinadən xəbər verir ki, bu barədə “Rusiya Dəmir Yolları”nın teleqram kanalında bildirilib.

"Dəqiqləşdirilmiş məlumata görə, dekabrın 18-də Murmansk-Sankt-Peterburq sərnişin qatarının qəzaya uğraması nəticəsində 31 nəfər xəsarət alıb, onlardan 5-i uşaqdır. 14 nəfər xəstəxanaya yerləşdirilib, onlardan 4-ü ağır vəziyyətdədir. 2 nəfər həlak olub", - məlumatda qeyd edilib.

Şirkət zərərçəkmiş sərnişinlərə öz tibb müəssisələrində pulsuz müalicə və reabilitasiya imkanı təqdim etməyə hazır olduğunu bildirib.

Daha əvvəl bildirilmişdi ki, dekabrın 18-də Moskva vaxtı ilə saat 16:15-də Murmansk vilayətinin Kandalakşa rayonunda yük qatarı Murmansk- Sankt-Peterburq sərnişin qatarı ilə toqquşub.