Meksikada qaz kəmərində partlayış nəticəsində ölənlərin sayı artıb

Oktyabrın 31-də Meksikanın mərkəzindəki Puebla ştatında qaz kəmərində baş vermiş partlayış nəticəsində ölənlərin sayı iki nəfərə çatıb.

"Report" xəbər verir ki, bu barədə regional səhiyyə departamenti tviterdə məlumat yayıb.

"62 yaşlı qadın bədən səthinin 72%-nin ikinci və üçüncü dərəcəli yanığı ilə dünyasını dəyişib", - məlumatda deyilir.

Partlayış nəticəsində daha 1 nəfər ölüb, 6 uşaq olmaqla, təxminən 15 nəfər yaralanıb. Hazırda xəstəxanada olan 13 nəfərin vəziyyəti orta ağır qiymətləndirilir.

Qaz kəmərində partlayış 50-yə yaxın evin dağılmasına səbəb olub.

Hökumət partlayışın nəticələrini aradan qaldırmaq üçün 1,4 min insan cəlb edib.