Madaqaskarda siklondan 1 000-ə yaxın insan xəsarət alıb

Madaqaskarı bürüyən Dikeledi tropik siklonunun nəticələri 915 nəfərin yaralanmasına, azı iki nəfərin itkin düşməsinə səbəb olub.

“Report” xəbər verir ki, bu barədə “Orangeactu” portalı Risk və Fəlakətlərin İdarə Edilməsi üzrə Milli Büroya istinadən məlumat yayıb.

Məlumata görə, sürəti 140 km/saata çatan qasırğalı küləklər və leysan yağışları Madaqaskarın şimal və şərq hissələrini əhatə edib. Nosi-Be adası və Ambre burnu ilə Besalampi şəhəri arasındakı yaşayış məntəqələrinə ziyan dəyib.

Qeyd olunub ki, Voemar və Maroantsetra şəhərlərindən 751 nəfər təcili təxliyə edilib.

Madaqaskar meteoroloji xidmətinin məlumatına görə, siklon Komor adalarına ardınca da Mozambikə çata bilər.