Ekvador prezidentliyinə namizəd seçkiqabağı görüşdən sonra öldürülüb

Ekvador prezidentliyinə namizəd Fernando Villavicencio seçkiqabağı görüşdən sonra naməlum şəxslər tərəfindən öldürülüb.

"Report" xəbər verir ki, bu barədə hazırkı dövlət başçısı Gilermo Lasso X-də (tviter - red.) yazıb.

Prezident qeyd edib ki, cinayət cəzasız qalmayacaq.

"El Universo" qəzetinin məlumatına görə, Villavicencio başından üç güllə yarası alıb.

Qeyd edək ki, avqustun 20-də Ekvadorda növbədənkənar prezident və parlament seçkiləri keçiriləcək. Sağ mərkəzçi Villavicencio sorğularda dördüncü və ya beşinci yerdə qərarlaşmışdı.

Lasso parlamenti buraxmaq üçün may ayında seçkilər təyin edib. 2025-ci ildə səlahiyyət müddəti başa çatmalı olan Lasso seçkilərdə iştirak etməyəcəyini açıqlayıb.