Braziliyada pilot pəncərəyə quş çırpılmasına görə təcili eniş edib

Braziliyada quşun təyyarənin pəncərəsinə çırpılaraq salona daxil olmasına görə pilot təcili eniş etməli olub.

“Report” xəbər verir ki, bu barədə “Daily Mail” yazıb.

Hadisə Envira-Eirunepe marşrutu üzrə hərəkət edən birmühərrikli təyyarənin göyərtəsində baş verib. Pilot şüşəyə çırpılan kərkəsin kabinənin içərisinə düşməsindən sonra təcili eniş etmək məcburiyyətində qalıb.

Ön pəncərəyə ciddi ziyan dəysə də, təyyarə təhlükəsiz şəkildə yerə enib və beş sərnişindən heç biri xəsarət almayıb.

Pilot təyyarəni təcili endirməsini təhlükəli durum olması ilə əlaqləndirib və qeyd edib ki, hadisənin baş verdiyi ərazidə zibilxana var və bu, çoxlu quşlar cəlb edir, nəticədə də hava limanına yaxınlaşan təyyarələr üçün daimi təhlükə yaradır.