Britaniya evsiz-eşiksiz insanların peyvənd olunmaları üçün 28 milyon funt ayırıb

Böyük Britaniya hökuməti evsiz-eşiksiz insanların koronavirusa qarşı peyvənd olunması məqsədilə 28 milyon funt sterlinq (37 milyon ABŞ dolları) ayırıb.

“Report” TASS-a istinadən xəbər verir ki, bu barədə Britaniya hökumətinin mətbuat xidməti məlumat yayıb.

Birləşmiş Krallıqda evsizlərin sayı 2020-ci ildə əvvəlki ilə nisbətən 37% azalıb. Növbəti üç il ərzində hökumət evsizlik problemini aradan qaldırmaq üçün 2 milyard funt sterlinq (2,6 milyard dollar) ayıracaq.

“Sky News” telekanalının və Britaniyanın bəzi KİV-lərinin məlumatına görə, ekspertlər səlahiyyətlilərə mümkün qədər qısa zamanda məhdudlaşdırıcı tədbirlərin tətbiqini tövsiyə edərək, yanvar ayında xəstəxanaya yerləşdirilən COVID-19 xəstələrinin gündəlik sayının hazırkı təqribi 900 nəfər göstəricisindən üç dəfə çox (təxminən 3 000 nəfər) ola biləcəyi barədə xəbərdarlıq edirlər. “Omikron” ştammının son dərəcə sürətlə yayılması həmçinin bir sıra əsas istiqamətlər üzrə, o cümlədən sosial xidmət sahələrində və həkimlərin sayında müvəqqəti kadr çatışmazlığına səbəb olmaq təhlükəsi yaradır. Potensial böhranı yumşaltmaq üçün ekspertlər Milad bayramına (25 dekabr) qədər kəskin tədbirlər görməyi tövsiyə edirlər.