Almaniyanın minlərlə sakini yenidən sağçı ekstremizmə qarşı aksiya keçirib

Almaniyanın minlərlə sakini növbəti dəfə müxtəlif şəhərlərdə sağçı ekstremizmə qarşı etiraz aksiyalarında iştirak edib.

"Report"un məlumatına görə, bu barədə DPA məlumat yayıb.

Hamm və Zoet (Şimali Reyn-Vestfaliya) şəhərlərində nümayişlərə ümumilikdə 8 min adam qatılıb. Veymarda (Türinqiya əyaləti) aksiyaya 1 000, Qrayfsvaldda (Meklenburq-Ön Pommern əyaləti) təxminən eyni sayda nümayişçi toplaşıb. Paderbornda (Şimali Reyn-Vestfaliya) mitinq sağçı populist "Almaniya üçün Alternativ" partiyasına qarşı yönəlib və 5 minə yaxın insan iştirak edib.

Aksiyalar zamanı heç bir ciddi insident qeydə alınmayıb.

Xatırladaq ki, ötən həftənin sonunda Almaniyada sağ ekstremizmə qarşı keçirilən onlarla aksiyada 1 milyona yaxın insan iştirak edib.