Həbsdə olan əcnəbi hakerin vaxtından əvvəl azadlığa buraxılması ilə bağlı həkim-ekspert rəy verəcək - MƏHKƏMƏ

Azərbaycanda həbsdə olan beynəlxalq kibercinayətkar şəbəkənin üzvü, Ukrayna vətəndaşı Serb Andrey Borisoviçin müraciətinə baxılıb.

“Report” xəbər verir ki, Nizami Rayon Məhkəməsində keçirilən prosesdə elan olunub ki, məhkum xəstəliyi ilə əlaqədar Penitensiar Xidmətin Müalicə Müəssisəsinə köçürülüb.

Müraciətdə kibercinayətkar səhhətindəki problemlərlə bağlı vaxtından əvvəl azadlığa buraxılması ilə bağlı məhkəməyə müraciət edib.

Məhkəmə ukraynalının müraciətini araşdırıb və bu qənaətə gəlib ki, məhkumun səhhəti ilə bağlı Ədliyyə Nazirliyi Tibb Baş İdarəsinin Xüsusi həkim-ekspert komissiyası tərəfindən rəy verilməlidir.

Bu səbəbdən proses təxirə salınıb.

Qeyd edək ki, Azərbaycan Dövlət Təhlükəsizliyi Xidməti və Maliyyə Bazarlarına Nəzarət Palatasının 2018-ci ilin mayında yaydıqları birgə məlumata əsasən, müxtəlif formal şirkətlər yaradılmaqla və onların bank hesabları açılmaqla Azərbaycan banklarından alınan POS-terminallardan istifadə etməklə kibercinayətkarlıq yolu ilə əcnəbilərin bank hesablarından milyonlarla vəsaitin yerli banklardakı qeyd olunan hesablara, həmin hesablardan isə MDB ölkələrindəki müxtəlif hesablara köçürülməsi yolu ilə talanması, yerli banklara əsassız daxil olmuş vəsaitlərin dəyərinin qeyd olunan xarici vətəndaşlara qaytarılması nəticəsində yerli banklara maddi ziyan vurulması məlum olub.

Dövlət Təhlükəsizliyi Xidmətində başlanılmış cinayət işi üzrə həyata keçirilmiş təxirəsalınmaz tədbirlər nəticəsində bu cinayət əməllərini törətməkdə şübhəli bilinən Rusiya Federasiyasının vətəndaşı Lunin Pavel Sergeyeviç və Ukrayna vətəndaşı Serb Andrii Borisoviç saxlanılaraq istintaqa cəlb olunub. Onlara məxsus bank hesablarında olan vəsaitlər müəyyən edilərək dondurulub, vətəndaşların oğurlanmış təxminən 2 milyon manata yaxın vəsaitinin geri qaytarılması təmin edilib.

Bakı Ağır Cinayətlər Məhkəməsinin hökmü ilə hər iki şəxs 12 il müddətinə azadlıqdan məhrum edilib.