MOVE: 2040-cı ilə qədər Orta Dəhlizlə illik daşınma 1,3 milyon TEU ola bilər

Avropa, Qafqaz və Mərkəzi Asiya arasında dayanıqlı nəqliyyat əlaqələri inkişaf etdirilməlidir.

“Report” xəbər verir ki, bunu Avropa Komissiyasının Baş Hərəkət və Nəqliyyat Müdirliyinin (MOVE) baş direktorunun müavini Maja Bakran Marciç COP29 çərçivəsində təşkil olunmuş “Dayanıqlı, rəqəmsal Orta Dəhliz və onun hüdudlarından kənar” mövzusunda nazirlərin dəyirmi masasında bildirib.

"Rusiya-Ukrayna müharibəsi buna əlavə aktuallıq gətirib. Ümumi uzunluğu təqribən 2 000 km olan Orta Dəhliz Şimal Dəhlizindən qısadır və nəqliyyat müddətini qısaltmaqla həqiqətən də real alternativ olmaq potensialına malikdir. Dəhliz vasitəsilə yüklərin daşınan yüklərin həcmi son 6 ildə 3 dəfə, müharibədən sonra isə 2 dəfə artıb", - deyə o qeyd edib.

Qonaq əlavə edib ki, ümumilikdə prioritet infrastruktur investisiyaları üçün təxminən 18,5 milyard avro lazımdır: "İndi yalnız 5 Mərkəzi Asiya ölkəsindən danışıram. Bu sərmayə ilə 2040-cı ilə qədər Orta Dəhlizdə təxminən 1,3 milyon TEU həcminə çatacağımızı proqnozlaşdırırıq".