Növbəti Avropa Oyunlarının tarixi və potensial ev sahibləri müəyyənləşib

Bakı. 19 sentyabr. REPORT.AZ/ 2019-cu il II Avropa Oyunları iyun ayının son 2 həftəsində keçiriləcək. "Report"un məlumatına görə, Oyunların tarixi Avropa Olimpiya Komitəsinin (EOC) İcraiyyə Komitəsinin Albaniyanın paytaxtı Tiranada keçirilmiş iclasında təsdiqlənib.

EOC prezidenti Patrik Hikki növbəti Avropa Oyunlarına bir neçə ölkənin, o cümlədən, Türkiyə, Belarus və Rusiyanın potensial ev sahibi olduğunu açıqlayıb. O, hazırda Oyunları keçirmək istəyində olanlarla danışıqların yekunlaşma mərhələsində olduğunu və qalibin gələn ay Çexiyanın paytaxtı Praqada keçiriləcək EOC Baş Assambleyasında açıqlanacağını vurğulayıb. Eyni zamanda, qurumun rəhbəri 2023-cü il III Avropa Oyunlarına potensial namizədlərlə də danışıqlar apardıqlarını bildirib.

P.Hikki deyib ki, II Avropa Oyunlarının tarixini indidən açıqlamaqla bütün maraqlı tərəflərə - Milli Olimpiya komitələri və qitənin idman federasiyalarına öz yarış təqvimlərini buna uyğunlaşdırmaq imkanı verilib. EOC prezidenti, həmçinin növbəti Oyunların proqramında atletikanın 5-6 əsas idman növü qismində yer alacağını, qalan növlərin isə təşkilatçılar tərəfindən seçiləcəyini əlavə edib.

Qeyd edək ki, I Avropa Oyunlarında mübarizə bu ilin 12 - 28 iyununda Bakıda 16 olimpiya və 4 qeyri-olimpiya növü üzrə aparılıb.