Azərbaycan Braziliya ilə kənd təsərrüfatı sahəsində Anlaşma Memorandumu imzalayıb

Azərbaycanla Braziliya arasında aqrobiznes sahəsində investisiyalar təşviq ediləcək.

“Report” xəbər verir ki, bunu kənd təsərrüfatı naziri Məcnun Məmmədov özünün “X” sosial şəbəkəsindəki hesabında bildirib.

Onun sözlərinə görə, bu məsələ Braziliya ilə imzalanmış kənd təsərrüfatı sahəsində Anlaşma Memorandumunda öz əksini tapıb: “Memorandum Braziliyada keçirilən G20 Kənd Təsərrüfatı Nazirləri Toplantısı çərçivəsində imzalanıb. Belə ki, memorandum ölkələrarası mövcud dostluq əlaqələrinin daha da genişləndirilməsinə xidmət edəcək”.

M. Məmmədov qeyd edib ki, memorandum özündə elmi və texnoloji yeniliklərin, ekspertlərin, mütəxəssislərin mübadiləsini, birgə müəssisələrin, investisiyaların və digər əməkdaşlıq formalarının təşviqini ehtiva edir: "İmzalanmış memorandumun ölkələrarası ticarət və aqrobiznes investisiyalarının təşviqinə mühüm töhfə verəcəyinə inanırıq”.

Braziliya Federativ Respublikası ilə kənd təsərrüfatı sahəsində ilk Anlaşma #Memorandumunu imzaladıq. #G20 Kənd Təsərrüfatı Nazirləri Toplantısı çərçivəsində həmkarım Carlos Favaro ilə keçirilmiş ikitərəfli görüş nəticəsində kənd təsərrüfatı sahəsində imzalanmış memorandum… pic.twitter.com/e01ww3ujAG

— Məcnun Məmmədov (@MajnunMammadov) September 16, 2024