Paşinyan Suriyada döyüşən ermənilərin Qarabağda məskunlaşmasını planlaşdırır - ŞƏRH

Bakı. 10 sentyabr. REPORT.AZ/ "Report" analitik Ehtiram Aşırlının məqaləsini təqdim edir:

Nikol Paşinyan gələcəkdə Suriyada döyüşən ermənilərin Qarabağda məskunlaşmasını planlaşdırır.

Ötən həftə ərzində Ermənistanın baş naziri erməni əsgərlərinin Rusiya bayrağı altında Suriyaya göndərə biləcəyini bildirmişdi. Bir sözlə, Ermənistan ordusunun hərbçiləri Rusiya Silahlı Qüvvələri tərkibində Suriyada Bəşər Əsəd rejiminin əleydarlarına qarşı hərbi əməliyyatlarda iştirak edə biləcəyini vurğulamışdı. Görünür, Nikol Paşinyan üçün Vladimir Putinlə görüş gözlənilən şəkildə keçməməsindən xəbər verir. Belə ki, Ermənistan baş naziri Sputnik Ermənistana müsahibəsində “Ermənistan humanitar missiyanı Suriyada, xüsusilə də Hələbdə aparacaq”.şəklində açıqlamayla çıxış edib. Həmçinin o, "Mən bunu artıq rəsmi olaraq söyləyə bilərəm. Layihənin əsas məqsədi, Hələb və Suriyanın erməni icmasına köməklik göstərməkdir. Müdafiə Nazirliyinin erməni humanitar missiyasının nümayəndələri Ermənistan bayrağı altında çıxış edəcəklər " - deyə bildirib. Bununla da Ermənistan ordusunun hərbçilərinin Rusiya Silahlı Qüvvələri tərkibində iştirak etməyəcəyini bildirmiş oldu.

Ayrıca, humanitar missiyanın Hələbdə aparılmasındakı əsas məqsəd Hələb ermənilərinin dəstəyini almaqdır. Xüsusilə də Hələb erməniləri Yaxın Şərq Erməni diasporları içərisində əhəmiyyətli mövqe tutur. Hətta çox ədəbiyyatda "Suriya Erməni diasporu" yerinə "Hələb Erməni diasporu" ifadəsi işlədilir. N.Paşinyan erməni diasporlarının bir-bir dəstəklərini almaqla ölkəni iqtisadi böhrandan xilas etməyə çalışır. 

Beləliklə, N.Paşinyan Suriya erməni diasporunun Qarabağ məsələsində dəstəyini almaqla kifayətlənməyib, ehtimal ki, gələcəkdə Suriyada döyüşən ermənilərin Qarabağda məskunlaşmasını planlaşdırır.

Analitik Ehtiram Aşırlı