Xorvatiyanın sabiq Prezidenti: “Bir çox Balkan ölkələri gələcəklərini Aİ-nin tərkibində görür”

“Balkan ölkələrinin Avropa İttifaqına qoşulması regionun bütün ölkələri üçün ümumi müzakirə platforması yaradacaq”.

“Report” xəbər verir ki, bunu Xorvatiyanın sabiq Prezidenti Kolinda Qrabar-Kitaroviç X Qlobal Bakı Forumu çərçivəsində keçirilən panel iclasında çıxışı zamanı deyib.

O qeyd edib ki, regionun bir çox ölkələri gələcəklərini Avropa İttifaqının (Aİ) tərkibində görür.

“Mən həmişə qonşu ölkələrin Avropa İttifaqı və NATO-ya daxil olmasını dəstəkləmişəm”, - deyən sabiq dövlət başçısı bütün regionun böyük potensiala malik olduğunu da vurğulayıb.

K.Qrabar-Kitaroviçin sözlərinə görə, Aİ qlobal elementə çevrilmək istəyirsə, Qərbi Balkan ölkələrini sıralarına daxil etməlidir.

“Zaman dəyişib, Ukraynadakı müharibə Avropa İttifaqının bütün təhlükəsizliyini pozub”, - eks-prezident söyləyib.