Ulu Öndər Heydər Əliyevin xatirəsi Strasburqda anılıb 

Azərbaycan Respublikasının Avropa Şurası yanında daimi nümayəndəliyi tərəfindən Strasburq şəhərində müasir, müstəqil Azərbaycan dövlətinin memarı və qurucusu, xalqımızın Ümummilli Lideri Heydər Əliyevin xatirəsinə həsr edilən tədbir təşkil olunub.

Bu barədə "Report"a Azərbaycanın Avropa Şurası yanında daimi nümayəndəliyindən bildirilib.

Tədbir iştirakçıları ilk əvvəl Ulu Öndərin əziz xatirəsini bir dəqiqəlik sükutla anıblar. İştirakçılar qarşısında çıxış edən Azərbaycan Respublikasının Avropa Şurası yanında daimi nümayəndəsi Fəxrəddin İsmayılov Azərbaycanın ən yeni tarixinin üzvü şəkildə Ümummilli Lider Heydər Əliyevin adı ilə bağlı olduğunu qeyd edərək, 1993-cü ildə Azərbaycan xalqının öz taleyini yenidən Ulu Öndərə həvalə edəndə, ümumiyyətlə Azərbaycan dövlətçiliyinin uçurum astanasında olduğunu yada salıb və yalnız Heydər Əliyev dühasının ölkəmizi və xalqımızı qaçılmaz görünən sarsıntılardan xilas etdiyini bildirib. F.İsmayılov həmçinin Ulu Öndərin müstəqilliyimizin dönməz xarakter alması, Azərbaycançılıq ideologiyasının təşviqi və milli şüurun dirçəlişi, böhran içində olan iqtisadiyyatımızın inkişafı və silahlı qüvvələrimizin möhkəm bünövrələr üzərində yenidən qurulması məqsədilə apardığı tarixi fəaliyyətlərdən bəhs edib. O, nəhayət, torpaqlarımızın işğaldan azad olunması istiqamətində Ümummilli Liderin başlatdığı işin Müzəffər Ali Baş Komandan, Prezident İlham Əliyev tərəfindən tarixi zəfərlə başa çatdırıldığını xatırladıb və Ulu Öndərin 100 illiyinin qeyd olunduğu 2023-cü ildə Azərbaycan Respublikasının suverenliyinin bərpa olunduğunu vurğulayıb.

Daha sonra TASS informasiya agentliyinin baş direktorunun birinci müavini Mixail Qusmanın müəllifi olduğu, Ümummilli Lider Heydər Əliyevin 100 illik yubileyinə həsr edilən “Liderin ürəyi” sənədli filmi tədbir iştirakçılarına nümayiş etdirilib.