Şimali Kiprin lideri Azərbaycan Prezidentini və xalqını təbrik edib

“Qarabağ torpaqlarını Ermənistan işğalından azad etmək, türk dünyasının əfsanəvi rəhbərlərindən olan mərhum Heydər Əliyevin vəsiyəti idi. Bu mənada bir il öncəki qələbə böyük Zəfərdir”.

Bu fikirləri “Report”un Türkiyə bürosuna açıqlamasında İstanbulda Vətən müharibəsindəki Zəfərin birinci ildönümü ilə bağlı keçirilən tədbirdə iştirak edən Şimali Kipr Türk Respublikasının prezidenti Ersin Tatar bildirib.

Ersin Tatar qeyd edib ki, bütün türk dövlətləri arasında daha da güclənən kommunikasiya, iqtisadi, siyasi, diplomatik və hərbi əməkdaşlıqdan Şimali Kipr Türk Respublikası da olduqca məmnundur :

“Azərbaycan və Türkiyə ilə birgə bütün sahələrdə daha böyük uğurlara imza atacağımıza ümid edirəm. Başda qardaş Azərbaycanın Ali Baş Komandanı İlham Əliyev olmaqla bütün Azərbaycan xalqını bu böyük Zəfər Günü münasibətilə təbrik edirəm”.