Metyu Brayza: "Antiterror tədbirlərinin dayandırılması Azərbaycanın mühüm diplomatik qələbəsidir”

“Bu gün lokal antiterror tədbirlərinin dayandırılması Azərbaycanın mühüm diplomatik qələbəsini göstərir. Ermənistanın baş naziri Nikol Paşinyanın Qarabağda erməni separatçılarına heç bir dəstək təklif etmədiyini nəzərə alsaq, bu razılaşma sülh sazişinin yolunu açır”.

Bunu “Report”a açıqlamasında beynəlxalq ekspert, Ceymstaun Fondunun İdarə Heyətinin üzvü, ABŞ-nin Azərbaycandakı keçmiş səfiri Metyu Brayza deyib.

Diplomat onu da vurğulayıb ki, Azərbaycan öz ərazilərini müdafiə etmək haqqına sahibdir: "Diplomatik karyeram ərzində qazandığım ən önəmli dərslərdən biri silahlı toqquşmalar, hərbi münaqişələrə dair hesabatlarda qeyri-dəqiqliklərin olmasıdır. Ona görə də indi də bir qədər ehtiyatlı davranmaq istəyirəm. Ancaq indi ortada açıq faktlar var, onlardan biri budur ki, Azərbaycan Müdafiə Nazirliyi bəyanat verərək ərazisindəki qeyri-qanuni erməni silahlılarına qarşı dəqiq planlaşdırılmış zərbələr endirmək niyyətini izah edib. Həmin videonu gördüm. Müdafiə Nazirliyi prosesi açıq şəkildə göstərir. Əlbəttə ki, Azərbaycan bu addımı ərazisini başqa bir ölkənin hərbi qüvvələrindən müdafiə etmək üçün etdi. Azərbaycan hökuməti onu da bildirdi ki, mülki əhalinin təhlükəsiz şəkildə erməni hərbçilərinin olduğu yerlərdən uzaqlaşmasını təmin edəcək".

Metyu Brayza əlavə edib ki, Azərbaycan nə qədər haqlı olmasından asılı olmayaraq, hərbi güc istifadə etdiyi üçün erməni tərəfinin və onu dəstəkləyənlərin kəskin tənqidinə məruz qalacaq: "İkinci Qarabağ müharibəsində də belə bir hal yaşandı, üçtərəfli bəyanat imzalanandan sonra Fransa Xarici İşlər Nazirliyi müharibədə Azərbaycanı günahlandırdığını açıqladı. İndi də Ermənistan Azərbaycanın təxribata əl atdığını deyəcək. Ancaq ən böyük təxribat Ermənistan silahlı qüvvələrinin hərbi birləşmələrinin hələ də Azərbaycanın Qarabağ regionunda olmalarıdır. 2020-ci il 10 noyabr bəyanatına əsasən, onlar Azərbaycan ərazisini tərk etməlidirlər. Hesab edirəm ki, lokal antiterror tədbirləri Müdafiə Nazirliyinin bəyanatına uyğun icra edildiyinə görə dünya Azərbaycana haqq qazandıracaq".