Azərbaycanın turizm imkanları Yaxın Şərq ölkələrində silsilə tədbirlərlə tanıdılır

Dövlət Turizm Agentliyi yanında Azərbaycan Turizm Bürosu "Dnata" şirkətinin iyunun 11-dən başlayaraq təşkil etdiyi və sabah başa çatacaq "Ahlan Arabia" adlı silsilə tədbirlərdə iştirak edir.

"Report" agentliyə istinadən xəbər verir ki, silsilə tədbirlər Küveytin Küveyt, Qətərin Doha və Birləşmiş Ərəb Əmirliklərinin Dubay şəhərlərində keçirilir.

Tədbirlər çərçivəsində B2B və B2C formatlı görüşlər təşkil olunub.

İkitərəfli əlaqələrin formalaşdırılması və genişləndirilməsi məqsədilə keçirilən görüşlərdə ölkəmizin turizm imkanları, o cümlədən Bakı və Azərbaycanın digər bölgələri, əsasən yay və qış mövsümü haqqında məlumat yerli turizm şirkətlərinə təqdim olunub.

Bundan əlavə, iştirakçılara Azərbaycanda mövcud olan sağlamlıq turizmi obyektləri və müalicəvi kurortlar, ekoturizm, qastronomiya kimi turizm məhsulları haqda məlumat verilib.

Bu ilin yanvar-may aylarında Yaxın Şərq ölkələrindən Azərbaycana 81 075 nəfər səfər edib ki, bu da illik müqayisədə 39 %-dən çox artım deməkdir.