Azərbaycanın işgüzar turizm potensialı Almaniyada təbliğ olunur

Dövlət Turizm Agentliyi yanında Azərbaycan Turizm Bürosunun təşkilatçılığı ilə ölkəmizin işgüzar turizm imkanları Almaniyada keçirilən, işgüzar tədbirlər sənayesinin mühüm sərgilərindən hesab olunan “IMEX Frankfurt” sərgisində təbliğ edilir.

"Report" bu barədə Agentliyə istinadən xəbər verir.

Məlumata görə, sərgidə milli stenddə işgüzar turizm imkanlarını tanıtmaq və bu məqsədlə Azərbaycana səfər edəcək sənaye nümayəndələrinin sayını artırmaq üçün Azərbaycan Turizm Bürosu ilə yanaşı, Heydər Əliyev Mərkəzi, Bakı Konqres Mərkəzi də daxil olmaqla ümumilikdə 10 yerli tərəfdaş təmsil olunur. Stenddə keçirilən görüşlərdə digər ölkələri təmsil edən nümayəndələrə Azərbaycanda müasir və geniş çeşidli xidmətlər təklif edən işgüzar turizm infrastrukturu, Heydər Əliyev Mərkəzi, Bakı Konqres Mərkəzi, Bakı Ekspo Mərkəzi kimi beynəlxalq səviyyəli tədbirlərin keçirildiyi məkanlar, eləcə də hotellər və irimiqyaslı biznes tədbirlərinə ev sahibliyi etmə potensialı haqqında məlumat verilir.

Sabah başa çatacaq “IMEX Frankfurt” sərgisinə 150-dən çox ölkədən 2 500 turizm nümayəndəsi qatılıb.

Xatırladaq ki, bu il Azərbaycan 74-cü Beynəlxalq Astronavtika Konqresi, Avropa Gənclər Parlamentinin 99-cu Beynəlxalq Sessiyası, Avropa Cranio Maksillo Üz Cərrahiyyəsi Assosiasiyasının Regional Konqresinə, həmçinin 2024-cü ildə “University Scholars Leadership” simpoziumuna ev sahibliyi etməyə hazırlaşır.