Britaniyanın qızıl hasilatçısı satdığı qiymətli metalın həcmini açıqlayıb

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti 2021-ci ilin üçüncü rübünün yekunları ilə bağlı satış həcmlərini açıqlayıb.

“Report”un şirkətin açıqladığı hesabata əsasən verdiyi məlumata görə, 2021-ci ilin iyul-avqust ayları ərzində şirkət tərəfindən satışı həyata keçirilən qızıl külçələrinin həcmi 6 828 unsiya təşkil edib. Bu, 2020-ci ilin eyni aylarının göstəriciləri ilə müqayisədə 229 unsiya və ya 3,5 % çoxdur.

Bu ilin üçüncü rübü ərzində bir unsiyanın satış qiyməti orta hesabla 1 815 ABŞ dolları təşkil edib ki, bu da 2020-ci ilin üçüncü rübünün orta qiymət göstəricisi ilə müqayisədə 132 ABŞ dolları və ya 6,8 % azdır.

2021-ci ilin üçüncü rübündə şirkət tərəfindən satışı həyata keçirilən mis konsetratının həcmi 3 549 quru metrik ton təşkil edib. Bu, 2020-ci ilin üçüncü rübünün göstəriciləri ilə müqayisədə 1 465 quru metrik ton və ya 70,3 % çoxdur.

2021-ci ilin üçüncü rübündə müştəriyə şirkət tərəfindən mis konsentratının tədarükünün satış dəyəri 5,7 milyon ABŞ dolları (Azərbaycan hökumətinin istehsal payı xaricində) təşkil edib. Bu isə daha əvvəlki 2020-ci ilin göstəriciləri ilə müqayisədə 2,3 milyon ABŞ dolları və ya 67,6 % çoxdur.

Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51 %, "Anglo-Asian Mining Plc." şirkətinin payı 49 % təşkil edir. İlk qızıl hasilatına ("Gədəbəy" yatağında) 2009-cu ildə başlanılıb. “Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Qadir” və “Gədəbəy” yatağından 50 km aralıdakı “Qoşa” yeraltı mədənində, yeni kəşf olunan "Uğur" yatağında da hasilatla məşğuldur.