"Anglo-Asian Mining” Azərbaycanda gümüş və mis istehsalını artırıb

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti “Gədəbəy” müqavilə ərazisi üzrə bu ilin birinci yarısında 32 171 unsiya qızıl ekvivalentində qiymətli metal filizləri istehsal edib.

“Report”un şirkətin açıqladığı hesabata əsasən, bu, 2020-ci ilin yanvar-iyun aylarına nisbətən 1,01 % azdır. 2020-ci ilin birinci yarısında bu həcmlər 32 501 unsiya qızıl ekvivalenti olub.

Bu ilin birinci yarısında şirkət tərəfindən 24 249 unsiya qızıl hasil edilib. Bu, 2020-ci ilin eyni dövrün göstəriciləri ilə müqayisədə 13,15 % azdır.

Bu dövr ərzində Britaniya şirkəti 1 333 ton mis istehsal edib. Bu, 2020-ci ilin birinci yarısının göstəriciləri ilə müqayisədə 10,43 % çoxdur.

Bu müddət ərzində "Anglo-Asian Mining Plc." şirkətinin gümüş istehsalı isə 78 981 unsiya təşkil edib. Bu isə 2020-ci ilin birinci yarısı ilə müqayisədə 34,94 % çoxdur.

Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51 %, "Anglo-Asian Mining Plc." şirkətinin payı 49 % təşkil edir. İlk qızıl hasilatına ("Gədəbəy" yatağında) 2009-cu ildə başlanılıb. “Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Qadir” və “Gədəbəy” yatağından 50 km aralıdakı “Qoşa” yeraltı mədənində, yeni kəşf olunan "Uğur" yatağında da hasilatla məşğuldur.