Rezidentlərin yekun attestasiyası keçiriləcək

Bakı. 24 oktyabr. REPORT.AZ/ Rezidentlərin yekun attestasiyasını Azərbaycan Tibb Universitetində Attestasiya Komissiyası aparacaq.

Səhiyyə Nazirliyinin mətbuat xidmətindən "Report"a verilən məlumata görə, attestasiya iki mərhələdə (test və praktik) olacaq.

Birinci mərhələdə rezident 3 saat ərzində 50 test sualına cavab verir. Test imtahanı komputer vasitəsilə aparılır. Test suallarına hər düzgün cavab 1 balla qiymətləndirilir. Səhv cavablar və ya sualın cavabsız qoyulması sıfır bala bərabər tutulur. Testin yekununa görə 40 və ya daha çox bal toplayan rezidentlər yekun attestasiyanın ikinci mərhələsinə buraxılırlar.

İkinci mərhələdə rezident tərəfindən 5 müxtəlif klinik hal araşdırılır. Klinik halların hər biri meyarları ali tibb təhsili müəssisəsində təyin edilən 10 bal çərçivəsində qiymətləndirilir. Bu mərhələnin yekununa görə 30 və ya daha çox bal toplamış rezident yekun attestasiyadan müvəffəqiyyətlə keçmiş hesab edilir.

Yekun attestasiyanın istənilən mərhələsində iştirak etmək üçün rezidentlər mütləq şəxsiyyət vəsiqələrini təqdim etməlidirlər.

Yekun attestasiyanın test mərhələsi oktyabrın 24-də saat 10:00-da Azərbaycan Tibb Universitetinin Virtual Test Mərkəzində (VTM) keçiriləcək. Rezidentlər şəxsiyyət vəsiqələrini təqdim etməklə VTM-də istifadəçi şifrəsini əldə edə bilərlər. VTM Azərbaycan Tibb Universitetinin 5-ci korpusunda yerləşir.

Yekun attestasiyanın praktik mərhələsi ixtisasdan asılı olaraq oktyabrın 29-u və 30-u saat 10:00-da Azərbaycan Tibb Universitetinin kafedralarında və klinikalarında keçiriləcək. Rezidentlərin göstərilən günlərdə saat 09.45-də ixtisas üzrə yekun attestasiyanın keçirildiyi müəssisədə olmaları tələb olunur. Yekun attestasiyanın ixtisaslar üzrə praktik mərhələsinin keçirildiyi yerlər aşağıdakı cədvəldə verilib: