Yuxarı
    Bağlamaq

    DİN: “İran Tacikistanda terrorçuları təlimatlandırıb, onlara tapşırıq verib və maliyyələşdirib”

    İranın maliyyə dəstəyi və tapşırığı ilə Tacikistanın tanınmış alimləri, siyasi xadimləri və jurnalistlərinin qətli həyata keçirilib

    Bakı. 9 avqust. REPORT.AZ/ “İran 1990-cı illərdə və 2001-ci ildə Tacikistanda terrorçuları təlimatlandırıb, onlara tapşırıq verib və maliyyələşdirib”.

    “Report” RİA "Novosti”yə istinadən xəbər verir ki, bunu Tacikistanın Daxili İşlər Nazirliyindən bildiriblər.

    Məlumata görə, ölkə DİN-i həmin dövrlərdə baş verən hadisələrlə bağlı sənədli film hazırlayıb. Film avqustun 8-də gecə saatlarında Tacikistan televiziyasında nümayiş etdirilib.

    Sənədli filmdə bildirilib ki, ölkə müdafiə nazirinin keçmiş müavini Əbdülxalim Nazarzoda İranın maliyyə dəstəyi və tapşırığı ilə 1990-cı illərdə Tacikistanın tanınmış alimləri, siyasi xadimləri və jurnalistlərinin qətlini həyata keçirib.

    Film qiyamçı general Nazarzodanın həbs edilən üç tərəfdarının – Taqomurad Aşrapov, Abdukodir Abdulloyev və Saymuxriddi Kudratovun ifadələrinə əsaslanıb. İstintaq zamanı onlar ötən əsrin 90-cı illərində İranın təlim-məşq düşərgələrində xüsusi təlimat aldıqlarını, bundan sonra onlara İran İslam Respublikası vətəndaşlığı pasportu verildiyini etiraf ediblər. Həmin şəxslər bildiriblər ki, Nazarzodanın tapşırığı ilə 1999-cu ildə Tacikistan parlamenti sədrinin keçmiş müavini Safarali Kencayevin, 1998-ci ildə tanınmış jurnalist və siyasətçi Otaxon Latifini, 1996-cı ildə tanınmış alimlər - Məhəmməd Osimini, Yusuf İshakini, Minxoca Qulyamovu, eləcə də 2001-ci ildə prezidentin müşaviri Kərim Yuldaşevi, 1992-1998-ci illərdə Rusiyanın Tacikistandakı hərbi bazasında 20 zabiti qətlə yetiriblər.

    T.Aşrapov, A.Abdulloyev və S.Kudratov bildirib ki, Ə.Nazarzoda onlara hər qətlə görə 2 min dollar pul verib.

    Məlumata görə, Tacikistan hüquq-mühafizə orqanlarının “İnterpol”un xətti ilə barəsində beynəlxalq axtarış elan etdikləri Kəbiri isə 2015-ci ildən İranda gizlənir.

    Xəbərdə bildirilib ki, İranın ona münasibətinə cavab olaraq, rəsmi Düşənbə İmam Xomeyni adına Xeyriyyə Cəmiyyətinin, iranlı sahibkarların Tacikistanda işləmələrinə, xüsusi ilə İslam Respublikasından ölkəyə ərzaq mallarının gətirilməsinə sanskiya tətbiq edib.

    Qeyd edək ki, İran hakimiyyəti Əfqanıstan və Tacikistanı fars dilli dövlət adlandıraraq, uzun illərdir onların daxili işlərinə müdaxilə etməyə, özünü "böyük qardaş" rolunda aparmağa çalışır. Hətta, Tehran bir zaman üç dövlətin ortaq televiziyasını yaratmağa da cəhd göstərib. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi