Ukraynada son 5 gündə 12 nəfər həlak olub, yaralı sayı 80-i keçib

Son 5 gündə Rusiyanın Ukraynaya endirdiyi zərbələr nəticəsində 12 nəfər həlak olub, 85 nəfər isə yaralanıb.

Bunu "Report"un Şərqi Avropa bürosuna açıqlamasında Ukrayna Milli Polisinin rəsmisi Viktoriya Ponamaryova bildirib.

"Ağır yaralanan 40 nəfərdən, 4-ü azyaşlı uşaqlardır. Bu dəfə müxtəlif raketlərdən və uzaq mənzilli artilleriyadan da istifadə olunur. Daha intensiv olanı pilotsuz uçuş aparatları ilə etdirilən zərbələrdir. Təkcə paytaxt Kiyevdə son 3 gündə bu hücumlar nəticəsində 4 nəfər həlak olub, 6 nəfər yaralanıb. 10-a qədər dövlət və mülki obyektlər dağılıb, mülki avtomobillər yararsız hala düşüb.

Qeyd olunan tələfatlar Kiyevdən başqa, Sumı, Çerniqov, Xarkov, Donetsk, Xerson vilayətlərini də əhatə edir. Ukrayna polisi və Fövqəladə hallar xidməti hadisə yerlərində axtarışları davam etdirirlər", - rəsmi əlavə edib.