Türkiyə XİN İsrailin İstanbuldakı baş konsuluna ölkəsinə qayıtmağı tövsiyə edib

Bakı. 16 may. REPORT.AZ/ İsrailin İstanbuldakı baş konsulu Yosef Levi-Sfari ölkəsinə qayıdır.  

“Report” “Ahaber”ə istinadən xəbər verir ki, Türkiyənin Xarici İşlər Nazirliyi israilli diplomata ölkəsinə dönməyi məsləhət görüb.

Qeyd edək ki, mayın 14-də Qüdsdə ABŞ səfirliyinin açılışı olub. Buna etiraz edən minlərlə fələstinli Qəzza zolağında aksiya keçirib. İsrail ordusunun açdığı atəş nəticəsində 62 fələstinli həlak olub, 3000-dən çox insan yaralanıb.

Bu hadisələr Türkiyə ilə İsrail və ABŞ arasında diplomatik qarşıdurmaya səbəb olub. İsrailin Türkiyədəki səfiri Eitan Naeh Xarici İşlər Nazirliyinə çağırılıb. Nazirlik diplomata ölkəsinə qayıtmağı tövsiyə edib.

Bundan başqa, Türkiyə Xarici İşlər Nazirliyi ölkənin Təl-Əvəidəki səfiri Kemal Ökem və Vaşinqtondfakı səfiri Serdar Kılıcı məsləhətləşəmə üçün geri çağırıb.

Mayın 15-də İsrailin Xarici İşlər Nazirliyi Türkiyənin Qüdsdəki baş konsulu Hüsnü Gürcandan ölkəni tərk etməyi tələb edib.

Mayın 16-da isə Türkiyə XİN İsrailin İstanbuldakı baş konsulu Yosef Levi-Sfariyə ölkəsinə qayıtmasını məsləhət görüb.