Ukrayna ordusu Rusiyanın 14 raketini havada məhv edib - YENİLƏNİB-5

Ukrayna Hava Hücumundan Müdafiə Qüvvələri oktyabrın 11-də Rusiyanın 14 raketini zərərsizləşdirib.

“Report” UNIAN-a istinadən xəbər verir ki, bu barədə Ukrayna Silahlı Qüvvələrinin Hərbi Hava Qüvvələri Komandanlığından bildirilib.

Onun sözlərinə görə, “Mərkəz” komandanlığı 2, “Şərq” komandanlığı 4, “Cənub” və “Qərb” komandanlığı isə ümumilikdə 8 raketi məhv ediblər.

Ukraynanın Nikolayev, Zaporojye, Krivoy-Roq, Pavloqrad, Vinnitsa, Rovne və Karpat bölgələrində silsilə partlayışlar olub.

“Report” Ukrayna mətbuatına istinadən xəbər verir ki, hadisələrin təfərrüatı hələ məlum deyil.

Oktyabrın 11-də Rusiyanın Ukrayna ərazisinə raket hücumları davam edib. Xəzər dənizinin Rusiyaya aid hissəsindən Krivoy Roq istiqamətində 10 qanadlı raket, Saratov vilayətindən də eyni sayda qanadlı raket atılıb. Məlumata görə, raketlər zərərsizləşdirilib.

Kiyev vilayətinin hava məkanında Rusiyanın daha bir raketi vurulub. Ukraynanın Xmelnitski vilayətində isə İran istehsalı olan “Şahed-136” dronu məhv edilib.

Ümumilikdə bu gün Rusiyanın Ukraynaya atdığı və zərərsizləşdirilən raketlərin sayı hələ ki məlum deyil.

Ukrayna Silahlı Qüvvələri Baş Qərargahının yaydığı məlumata əsasən, Rusiya son sutkada Ukrayna ərazisinə 60-dan artıq raket atıb, 32 aviazərbə endirib, eləcə də reaktiv yaylım atəşi sistemindən atəş açıb.

Rusiya 30-dan artıq şəhər və kəndə, o cümlədən Kiyev, Lvov, Rovno, Jitomir, Ternopol, Xmelnitski, İvano-Frankovsk, Vinnitsa, Priluka, Nejin, Konotop, Xarkov, Kremençuq, Dnepr, Krivoy Roq, Zaporojye, Nikolayev, Odessaya ziyan dəyib.

Məlumata görə, rəqib Ukrayna Silahlı Qüvvələrinin Xarkov və Xerson istiqamətində əks-hücumunun qarşısını ala bilmir. Ona görə də dinc sakinlər arasında vahimə yaratmaq üçün şəhərləri və kəndləri raket atəşinə tutur.

Ukrayna Baş Qərargahından bildirilib ki, Belarus hakimiyyəti öz hava məkanından Rusiyanın Ukraynaya aviazərbə endirməsinə şərait yaradır.

Ukraynanın daha 2 vilayətində partlayış baş verib.

“Report” UNIAN-a istinadən xəbər verir ki, Rivne və Krivoy Roq vilayətlərində partlayış səsləri eşidilib.

"Partlayışın təfərrüatı hələlik məlum deyil", - məlumatda qeyd edilib.

Ukraynanın Odessa vilayətində partlayış olub.

“Report” UNIAN-a istinadən xəbər verir ki, yerli əhali partlayış səsləri eşidib.

Hadisənin təfərrüatları hələ ki, məlum deyil.

Rusiya Ukraynanın Zaporojye şəhərinə 12 ədəd "S-300" zenit raketi atıb, ölən var.

“Report” “Ukrinform”a istinadən xəbər verir ki, bu barədə Zaporojye Regional Hərbi Administrasiyasından bildirilib.

Qeyd olunub ki, ictimai iaşə obyektləri, o cümlədən təhsil müssisələri ilə yanaşı, dövlət obyektləri də hədəf alınıb.

Fövqəladə Hallar Nazirliyinin əməkdaşları ərazidəki yanğını söndürüblər.

Məlumata görə, Rusiyanın atdığı 2 raket avtosalona düşüb, 1 nəfər ölüb.

Bu gün səhər saatlarında Rusiya Ukraynanın Zaporojye şəhərinin mərkəzinə raket zərbələri endirib.

“Report” “Ukrainski pravda”ya istinadən xəbər verir ki, bunu Zaporojye Hərbi Administrasiyasının rəhbəri Oleksandr Starux bildirib.

O deyib ki, hücum zamanı infrastruktur obyektləri hədəfə alınıb.

Dağıntı və tələfatla bağlı araşdırma aparılır.

Məlumata görə, Rusiyanın hücumu zamanı ictimai iaşə obyektlərinə, o cümlədən təhsil və tibbi müəssisələrinə, yaşayış binalarına ziyan dəyib.

Qeyd edək ki, oktyabrın 10-da Rusiya Silahlı Qüvvələri Ukraynanın paytaxtı Kiyev şəhərini və bir neçə vilayəti raket atəşinə tutub.