İran SWIFT sistemini ACUMER-lə əvəzləyib

İran SWIFT (“Society for Worldwide Interbank Financial Telecommunication” - Dünya miqyasında banklararası maliyyə kommunikasiyaları icması) sistemini ACUMER maliyyə mübadilə sistemi ilə əvəzləyib.

“Report” İran İnqilab Keşikçiləri Qvardiyasının (Sepah) teleqram kanalına istinadən xəbər verir ki, bu barədə Mərkəzi Bankın rəhbəri Məhəmməd Reza Fərzin bildirib.

Məlumata görə, Rusiya ilə ikitərəfli valyuta müqaviləsi bağlanıb. Anlaşmaya əsasən, tərəflər arasında dollar ödənişlərdən tamamilə çıxarılıb, əvəzedici kimi tümən və rubl dövriyyəyə buraxılıb. ACUMER sistemi Hindistan, Pakistan və Asiya Klirinq (Klirinq - qiymətli kağızlar və törəmə maliyyə vasitələrinin qarşılıqlı hesablamalar sistemi) İttifaqına daxil olan başqa ölkələrlə əməkdaşlıq etməyə imkan verir.

M. Fərzin qeyd edib ki, son iki ildə bank şəbəkəsinə kiberhücumlar tez-tez baş verir: "Bu, onun sabitliyinin gücləndirilməsini tələb edir. Müəyyən tədbirlər görülsə də, hələ ki, bunlar kifayət deyil”.