Çin ABŞ iqtisadiyyatına yatırımları azaldıb

Çinin 2019-cu ildə ABŞ iqtisadiyyatına birbaşa sərmayəsi öncəki illə (5,4 milyard dollar) müqayisədə azalaraq 5 milyard ABŞ dollarına düşüb.

“Report” xəbər verir ki, bu barədə “Associated Press” agentliyi ABŞ-Çin Münasibətləri üzrə Milli Komitənin və “Rhodium Group” şirkətinin hesabatına istinadən məlumat yayıb.

Araşdırmanın nəticələrinə görə, Çinin 2019-cu ildə ABŞ iqtisadiyyatına qoyduğu investisiya həcmi dünya iqtisadiyyatının tənəzzülə uğradığı 2009-cu ildən bu yana ən aşağı səviyyədə olub.

Mütəxəssislər bu vəziyyəti iki ölkə arasındakı münasibətlərin soyuması və Çin hökumətinin xarici kapitala qoyulan sərmayələrə tətbiq etdiyi məhdudiyyətlərlə əlaqələndirirlər.

ABŞ sahibkarlarının Çin iqtisadiyyatına yatırımları isə, əksinə, 2019-cu ildə öncəki ildəki 13 milyarddan 14 milyard ABŞ dollarına qədər artıb.