IMF Azərbaycan bank sektorunun vəziyyətini qiymətləndirib

Azərbaycanın bank sektorunun kapital adekvatlığı əmsalı, risklərin pandemiyadan əvvəlki səviyyələrə enməsi ilə 2021-ci ilin sonunda hələ də nisbətən yüksək olan 19,1 % səviyyədək geriləyib.

"Report" xəbər verir ki, bu barədə Beynəlxalq Valyuta Fondunun (IMF) mayın 25-dən iyunun 7-dək Bakıda keçirilmiş IV maddə üzrə məsləhətləşmələrin yekunlarına dair bəyanatında deyilir.

“Bunun nəticəsində riskli aktivlər sürətlə artıb. Eyni zamanda, bəzi banklar kredit imkanlarını artırmaq üçün əlavə kapital yatırıblar”, - Valyuta Fondu qeyd edir.

Açıqlamaya görə, problemli kreditlərin nisbəti azalmağa davam edib, bu da həm kredit keyfiyyətinin yaxşılaşmasını, həm də effektiv maliyyə dəstəyi tədbirlərini əks etdirib:

"Banklar daha yüksək gəlir əldə etməyə və pandemiya zamanı təxirə salınmış tələbi qarşılamağa çalışdığı üçün xüsusilə istehlak kreditlərində kredit axını artıb".

IMF-in qeyd etdiyi kimi, de-dollarlaşma tendensiyaları ümumilikdə davam edib və kreditlərin dollarlaşması 2022-ci ilin martına qədər 25,4 %-ə düşüb ki, bu da son yeddi ilin ən aşağı səviyyəsidir.

"2022-ci ilin birinci rübündə bankların xarici valyuta öhdəlikləri artması və xarici valyutada kreditlərin azalmağa davam etməsi ilə müəyyən artım olsa da, xalis açıq valyuta mövqeləri ümumiyyətlə azalıb", - Fondun iqtisadçıları bildirib.

Valyuta Fondu təminatsız biznes kreditlərinin və yenidən strukturlaşdırılmış kreditlərin əsas kredit riskləri olaraq qaldığını vurğulayır: "Əsasən korporativ sektorda olmaqla restrukturizasiya olunmuş kreditlər artıb və kifayət qədər rezervlə təmin edilməyə bilər, çünki hazırkı qaydalar gözlənilən kredit itkilərinə əsaslanmayıb.

Bir sıra banklarda istehlak kreditləri də sürətlə artır.

Son stress testləri göstərir ki, problemli kreditlərin (NPL) nisbəti ən pis ssenaridə 2015-2016-cı illər böhranı zamanı olduğu kimi artacaq.

Mərkəzi Bank bu riskləri nəzərə alır və əsasən istehlak kreditləri olmaqla riskləri yaxından izləyir".