Avrozonada illik inflyasiya 13 illik maksimumu yeniləyib

İlkin məlumata görə, bu ilin oktyabr ayında avrozonada illik inflyasiya sentyabr ayı ilə müqayisədə 0,7 faiz bəndi artaraq 3,4%-dən 4,1%-ə çatıb.

“Report” xarici mətbuata istinadən xəbər verir ki, bu barədə Avropa Statistika İdarəsi ("Eurostat") məlumat yayıb.

Məlumata görə, bu, 2008-ci ilin iyul ayında qeydə alınmış maksimumun yenilənməsidir.

Bu ay avrozonada ən yüksək illik inflyasiya 23,5%-lə enerji sektorunda qeydə alınıb. Onu 2,1%-lə xidmətlər, 2%-lə sənaye məhsulları, qida, spirt və tütün məmulatları izləyib.

Hesabat dövründə avrozonada ən yüksək illik inflyasiya Litvada (8,2%), Estoniyada (7,4%), İspaniyada (5,5%) və Belçikada (5,4%) qeydə alınıb.

Avropa Mərkəzi Bankının rəhbəri Kristina Laqard bildirib ki, qitə ölkələrində inflyasiya bu ilin sonuna qədər sürətlənməkdə davam edəcək, gələn ildən isə yavaşlayacaq.