Bu il Argentinada inflyasiya 100 %-i keçə bilər

Argentinada inflyasiya 2023-cü ilin sonuna kimi 110 %-ə çata bilər.

“Report” xəbər verir ki, bu barədə məlumatı ölkənin Mərkəzi Bankı yayıb.

“Analitiklərin fikrincə, 2023-cü ilin mart ayında aylıq inflyasiya 7 % təşkil edib və bütün il üçün bu, 110 % (əvvəlki proqnozdan 10,2 faiz bəndi çox) təşkil edəcək”, – Mərkəzi Bankın dərc etdiyi hesabatda deyilir.

Ekspertlər qiymətlərin 2024-cü ildə 90 %, 2025-ci ildə isə 54,6 % artacağını gözləyirlər.

Argentina artıq bir neçə ildir ki, inflyasiyanın ən yüksək olduğu ölkələr sırasındadır. 2022-ci ilin sonunda inflyasiya 94,8 %, 2021-ci ildə 50,9 %, 2020-ci ildə 36,1 %, 2019-cu ildə 53,8 % təşkil edib.