Qazaxıstan və Çin Kurık limanından Bakıya Orta Dəhliz üzrə sınaq avtomobil yük daşınmasına başlayıb

Qazaxıstan və Çin Kurık dəniz limanından Bakıya Transxəzər Beynəlxalq Nəqliyyat Marşrutu (Orta Dəhliz) ilə yüklərin Avropaya tranzit avtomobil daşınmasına sınaq rejimində başlayıb.

Bu barədə “Report”a Qazaxıstanın Nəqliyyat Nazirliyindən məlumat verilib.

“Aktauda avtomobil daşımaları üzrə Qazaxıstan-Çin birgə komissiyasının iclası keçirilir. İclasda tarixdə ilk dəfə olaraq Kurık və Bakı dəniz limanları vasitəsilə Çin-Qazaxıstan-Azərbaycan-Gürcüstan marşrutu üzrə yüklərin sınaq tranzit daşınmasına start verilib”, - qurum bildirib.

Nəqliyyat Nazirliyinin məlumatına görə, Urumçidən yola düşən 80 ton ağırlığında ilk üç Çin yük maşını Çin-Qazaxıstan-Azərbaycan-Gürcüstan marşrutu üzrə Bakıya sonrakı gediş-gəliş üçün mayın 23-də Kurık limanında bərəyə yüklənib.

“Tarixdə ilk dəfə olaraq iki ölkənin nəqliyyat vasitələri tərəflərin bütün əsas ticarət şəhərlərinə birbaşa səyahət etmək və hətta ərazilər vasitəsilə tranzit səyahətlər etmək imkanı əldə edib”, - Qazaxıstan Nəqliyyat Nazirliyinin Avtomobil Nəqliyyatı və Nəqliyyat Nəzarəti Komitəsinin sədri Ali Altay komissiyanın iclasında bildirib.

Onun sözlərinə görə, Çindən Qərb ölkələrinə yüz milyonlarla ton yük dəniz yolu ilə, daha kiçik həcmdə 52 günə qədər, dəmir yolu ilə isə 22 günə qədər çatdırılır. Orta Dəhlizdən istifadə sayəsində avtomobil nəqliyyatı yüklərin aralıq yükləmə/boşaltma olmadan “qapıdan qapıya” çatdırılması ilə 12 günə qədər azalda bilər.

Xatırladaq ki, Transxəzər Beynəlxalq Nəqliyyat Marşrutu Çin, Qazaxıstan, Xəzər dənizi, Azərbaycan, Gürcüstan ərazisindən keçərək Türkiyə və Avropa ölkələrinə uzanan beynəlxalq nəqliyyat dəhlizidir.