Azərbaycanda FLIRT qatarları daha bir marşruta buraxılır 

Bakı-Qəbələ-Bakı marşrutu üzrə hərəkət edən KISS markalı qatar yeni FLIRT qatarı ilə əvəz edilir.

"Report" “Azərbaycan Dəmir Yolları” QSC-yə (ADY) istinadən xəbər verir ki, aprelin 5-dən FLIRT qatarı ənənəvi hərəkət cədvəli əsasında həftənin şənbə günləri Bakıdan Qəbələyə, bazar günləri isə Qəbələdən Bakıya yola düşəcək.

Məlumata əsasən, ən son təhlükəsizlik sistemləri ilə təchiz edilmiş birmərtəbəli yeni qatarda sərnişinlərin rahatlığı üçün bar-vaqon, velosiped daşımaq üçün ayrılmış yerlər, inklüziv səyahət imkanları və s. təqdim olunur.

Xatırladaq ki, aprelin 1-dən Abşeron dairəvi marşrutu üzrə İsveçrənin “Stadler” şirkətinin istehsalı olan FLIRT qatarı istifadəyə verilib. Qatarın maksimal sürəti 125 km/s, orta sürəti 85 km/s-dir.