Dövlət Xidməti: 73 dövlət qurumu informasiya təhlükəsizliyi tələbi üzrə rəy almaq üçün müraciət edib

Bu günə kimi 73 dövlət qurumundan onların elektron sənəd dövriyyəsi sistemlərinin altsistemə inteqrasiyası üçün Xüsusi Rabitə və İnformasiya Təhlükəsizliyi Dövlət Xidmətinə (XRİTDX) informasiya təhlükəsizliyi tələblərinə cavab verməsi üzrə rəy verilməsi barədə müraciətlər daxil olub.

“Report” quruma istinadən xəbər verir ki, müraciətlər əsasında informasiya təhlükəsizliyi auditləri zamanı dövlət qurumlarının istifadəsində olan daxili elektron sənəd dövriyyəsi sistemlərində aşkarlanan informasiya təhlükəsizliyi boşluqları və onların aradan qaldırılması istiqamətində tövsiyələr həmin dövlət qurumlarına göndərilib.

Hazırda informasiya təhlükəsizliyi üzrə müsbət rəy almış 63 dövlət qurumunun daxili elektron sənəd dövriyyəsi sistemi mühafizə olunan telekommunikasiya kanalları - "AzStateNet" data şəbəkəsi vasitəsilə “Rəqəmsal Sənəd Dövriyyəsi” altsisteminə qoşulub.

Xatırladaq ki, ölkə Prezidentinin 1 avqust 2023-cü il tarixli “Dövlət orqanları (qurumları) arasında sənəd mübadiləsinin elektronlaşdırılması haqqında” Fərmanının 8-ci bəndlərinə əsasən dövlət orqanlarının istifadəsində olan elektron sənəd dövriyyəsi sistemlərinin və həmçinin Rəqəmsal İnkişaf və Nəqliyyat Nazirliyinin yaratdığı “Rəqəmsal Sənəd Dövriyyəsi” altsisteminin informasiya təhlükəsizliyi tələblərinə cavab verməsi ilə bağlı rəyin verilməsi və mühafizə olunan telekommunikasiya kanalları ilə təmin edilməsi Xidmətə tapşırılıb.