Goranboyda qurumuş nəhəng ağac sakinlərin həyatına təhlükə yaradır

Goranboy rayonunun Boluslu kəndində qurumuş nəhəng Qovaq ağacının iri budağı qırılaraq yola düşüb.

“Report”un Qərb bürosunun məlumatına görə, təxminən 70 il öncə əkilmiş ağac quruyub və hər an aşaraq yaxınlıqda olan orta məktəbə və insanlara ciddi zərər vura bilər.

Sakinlər bildirib ki, ağacın olduğu küçədə həmçinin poçt binası və tibb məntəqəsi də fəaliyyət göstərir. Bu da təhlükəli sayılan ağacın yaxınlığından keçən insanların çox olması anlamı daşıyır.

Kənd sakinləri aidiyyəti qurumlardan ciddi bir fəsadlar olmadan tədbir görülməsini istəyiblər.

Qeyd edək ki, iri gövdəli budağın sınaraq yola düşməsi nəticəsində xoşbəxtlikdən zərər çəkən olmayıb.