Yuxarı
    Bağlamaq

    General Sübahir Qurbanov agentlərə çatmalı olan 1 milyon manatı mənimsəyib - İTTİHAM AKTI

    Həmin pul vəsaitləri nazirliyin Maliyyə idarəsinin kassasından götürülüb

    Bakı. 5 yanvar. REPORT.AZ/ Ləğv olunmuş Milli Təhlükəsizlik Nazirliyinin (MTN) sabiq baş idarə və idarə rəisləri general-mayor Sübahir Qurbanov, general-mayor Teymur Quliyev, general-mayor Natavan Mirvətova, eləcə də həmin qurumun digər vəzifəli şəxsləri Fizuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun cinayət işi üzrə 2013-cü ilin oktyabr ayında xüsusi xərclər smetasından ayrılmış pul vəsaitindən 1 milyon manatın mənimsənilməsi ilə bağlı epizod məlum olub.

    "Report"un məlumatına görə, ittiham aktında qeyd edilib ki, istintaq zamanı S.Qurbanov, F.Əliyev və qeyriləri tərəfindən MTN-nin Maliyyə idarəsinin kassasından xüsusi xərclər smetasından ayrılmış pul vəsaitlərindən 1 milyon manat guya muxtəlif agentlərə mükafat kimi verilməsi üçün götürülüb.

    Lakin həmin pulların təyinatı üzrə xərclənməyərək, MTN əməkdaşları tərəfindən mənimsədikləri toplanan təkzibedilməz sübutlarla tam təsdiqini tapıb.

    Belə ki, Dövlət Təhlükəsizliyi Xidmətindən (DTX) istintaqa təqdim edilən 04.07.2016-cı il tarixli 4/1598 nömrəli xidməti araşdırmaya dair arayışından görünür ki, S.Qurbanovun verdiyi vəkalətnamələr əsasında baş idarənin əməkdaşları tərəfindən Maliyyə idarəsinin kassasından ümimilikdə 9 nəfər agentin birdəfəlik mükafatlandırılması üçün 1 milyon manat pul vəsaiti götürülüb.

    Xidməti yoxlama zamanı müəyyən edilib ki, həmin agentlərin göstərilən yüksək məbləğlərdə (100.000-150.000 manat olmaqla) birdəfəlik pulla mükafatlandırılmaları üçün S.Qurbanov tərəfindən sabiq milli təhlükəsizlik naziri Eldar Mahmudova məruzə edilib. Raportlarda göstərilən istiqamətlər üzrə əməliyyat mənbələrindən zəruri əməliyyat əhəmiyyətli məlumatlar alınmayıb və bu haqda müvafiq arayışlar tərtib edilməyib. Ümumiyyətlə isə həmin pul vəsaitlərinin MTN-in xüsusi xərclər smetasından ayırlmasının heç bir məqsədəuyğunluğu və əməliyyat zəruriliyi olmayıb və onlar təyinatı üzrə istifadə edilməyib. Həmin pul vəsaitlərini Maliyyə idarəsinin kassasından götürülüb, əməkdaşların bir qismindən izahatlar alınıb və sözügedən agentlərlə nəzarət görüşləri keçirilib.

    Qeyd edək ki, S.Qurbanov Cinayət Məcəlləsinin 145.3, 178.3.1, 178.3.2, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 320.1, 320.2, 341.2.1, 341.2.2, 341.2.3-cü maddələri ilə ittiham olunur. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi