Ağdərədə mikroavtobus dərəyə aşıb, xəsarət alanlar var - YENİLƏNİB

Ağdərə rayonun Suqovuşan kəndi ərazisində yol-nəqliyyat hadisəsi səbəbilə xəsarət alan 6 nəfər (kişi) iyulun 7-si saat 21:40 radələrində Tərtər Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

TƏBİB-dən "Report"un sorğusuna cavab olaraq bildirilib ki, onlara bədənin müxtəlif nahiyələrinin çoxsaylı travması diaqnozu təyin edilib.

Qeyd olunub ki, pasiyentlərdən 2 nəfər Mingəçevir şəhərində, 1 nəfər isə Bərdə rayonunda yerləşən özəl tibb müəssisələrindən birinə göndərişlə təmin olunub. 1 nəfər isə öz istəyi ilə tibbi xidmətdən imtina edib.

Məlumata görə, hazırda 2 pasiyentin müalicəsi Tərtər Rayon Mərkəzi Xəstəxanasında davam etdirilir, vəziyyətləri orta ağır qiymətləndirilir.

07:24

Ağdərədə fəhlələri daşıyan mikroavtobus dərəyə aşıb.

"Report"un Qarabağ bürosunun xəbərinə görə, hadisə rayonun Suqovuşan kəndi ərazisində qeydə alınıb.

İlkin məlumatlara görə, qəza zamanı 6 nəfər müxtəlif dərəcəli xəsarətlər alıb. Mikroavtobusun şirkətlərdən birində çalışan işçiləri daşıdığı qeyd olunur.

Xəsarət alan 6 nəfərdən 3-ü Mingəçevirdəki özəl xəstəxanaya yerləşdiriliblər.

Qəza nəticəsində xəsarət alan digər 3 nəfər isə Bərdə Diaqnostika Mərkəzinə yerləşdirilib.

Faktla bağlı araşdırma aparılır.