Qurban Qurbanov: "Beşiktaş"la oyun üçün qərar Bakıda veriləcək"

Bakı. 13 dekabr. REPORT.AZ/ "Yaxşı oyun alındı. Mərhələnin ilk oyunu üçün yaxşı nəticə idi. Azarkeş və futbolçularımızı təbrik edirəm". 

"Report"un məlumatına görə, bunu Azərbaycan Kubokunun 1/4 final mərhələsinin "Sumqayıt"la keçirilən ilk oyunundan sonra "Qarabağ"ın baş məşqçi Qurban Qurbanov deyib. 

Baş məşqçi 6:0 hesablı qələbədən sonra bunları bildirib: "Sumqayıt"a uğurlar arzu edirəm. İtkiləri çox idi. Futbolçularımın oyunundan razı qaldım. Cavab görüşündə dəyişikliklər olacaq. Amma indidən deyə bilmərəm. Çünki Premyer Liqa oyunumuz var". 

Q.Qurbanov "Beşiktaş"la qışda keçirilməsi nəzərdə tutulan yoldaşlıq görüşü haqqında da danışıb: "Klub rəhbərliyi səviyyəsində danışıqlar olub. Amma ortada dəqiq nəsə yoxdur. Xəbərim var ki, əməkdaşlıq etmək, Bakıda yoldaşlıq görüşü keçirmək istəyirlər. Onların klub nümayəndələri Bakıya gələndən sonra dəqiq qərar veriləcək".