PSJ Messinin transferindən sonra satılmış formaların sayını açıqlayıb

Fransanın PSJ klubu Lionel Messinin transferindən sonra argentinalı futbolçunun 1 milyona yaxın formasını satıb.

"Report"un məlumatına görə, bu barədə Paris təmsilçisinin sponsorluq üzrə direktoru Mark Armstronq "Goal" nəşrinə açıqlamasında deyib.

O bildirib ki, 34 yaşlı hücumçunun kluba kommersiya baxımından da inanılmaz faydası dəyir: "Düşünürəm ki, 2020-ci ildə digər klublardan daha çox forma satdıq. 2021-ci ildəki rəqəmlər isə daha yaxşıdır. Formalara tələbat ən azı 30-40% artıb".

Qeyd edək ki, Lionel Messi PSJ-yə cari mövsümün əvvəlində İspaniya "Barselona"sından azad agent kimi keçib.