Premyer Liqa: "Kəpəz" "Səbail" üzərində qələbə qazanıb

Misli Premyer Liqasının XII turunda "Kəpəz" "Səbail" üzərində qələbə qazanıb.

"Report" xəbər verir ki, Tovuz şəhər stadionunda keçirilən qarşılaşma Gəncə klubunun 1:0 hesablı üstünlüyü ilə yekunlaşıb.

Yeganə qolu 90+5-ci dəqiqədə Camal Cəfərov vurub.

Bu nəticədən sonra xallarının sayını 6-ya yüksəltməsinə baxmayaraq "Kəpəz" hələ də turnir cədvəlində sonuncu-10-cu yerdədir. "Səbail" isə 7 xalla doqquzuncudur.

Turun son qarşılaşması bu gün Sumqayıtdakı Mehdi Hüseynzadə adına stadionda gerçəkləşəcək. "Sumqayıt" evdə "Sabah"la qarşılaşacaq. Rəvan Həmzəzadənin idarə edəcəyi görüşə saat 19:00-da start veriləcək.

Hazırda "Sabah" 17 xalla beşinci pillədə yer alıb. "Sumqayıt" isə 10 xalla 7-cidir.

Qeyd edək ki, turun əvvəlki oyunlarında "Neftçi" evdə "Araz-Naxçıvan"a uduzub - 0:1. "Turan-Tovuz" - "Qarabağ" matçında qol vurulmayıb. "Zirə" isə səfərdə "Şamaxı"nı məğlub edib - 2:0.