Portuqaliyalı yarımmüdafiəçi millimizlə oyunu buraxa bilər

Futbol üzrə Portuqaliya millisi DÇ-2022-nin seçmə mərhələsinin Azərbaycan yığması ilə oyununa ciddi itki ilə çıxa bilər.

"Report" "A Bola" nəşrinə istinadən xəbər verir ki, komandanın aparıcı futbolçularından Renatu Sanşeş sıradan çıxıb.

Fransanın "Lill" klubunda oynayan 24 yaşlı yarımmüdafiəçi ölkə kubokunun 1/8 final mərhələsinin PSJ ilə matçından (0:3) öncəki məşqdə sol ayağından zədələnib. Onun seçmə mərhələnin görüşlərinədək sıraya qayıdıb-qayıtmayacağı bəlli deyil.

Qeyd edək ki, martın 24-də İtaliyanın Turin şəhərindəki "Yuventus" stadionunda oynanılacaq Portuqaliya - Azərbaycan matçı Bakı vaxtı ilə saat 23:45-də başlayacaq.